სენაკის მუნიციპალიტეტის ზოგადსაგანმანათლებლო სკოლებსა და სკოლამდელი აღზრდის სექტორში, ახალი სასწავლო წელი საკლასო ოთახებში განახლდა.

დღეს ზემო ფოცხოს ადმინისტრაციულ ერთეულში ახალი სკოლა გაიხსნა; სენაკში, შხეფის უბანში კი – ახალი ბაგა-ბაღი.

პედაგოგებს, მოსწავლეებს და პატარა აღსაზრდელებს ახალი სკოლის და ბაღის გახსნა სენაკის მუნიციპალიტეტის მერის პირველმა მოადგილემ გრიგოლ ბაღათურიამ, შესაბამისი სექტორის წარმომადგენლებთან ერთად მიულოცა.

თანამედროვე სტანდარტების შესაბამისი, 300 მოსწავლეზე გათვლილი, სათანადო ინვენტარით, კეთილმოწყობილი საკლასო ოთახებით და განახლებული სპორტული ინფრასტრუქტურით აღჭურვილი სკოლის სრული რეაბილიტაციის პროექტი ინფრასტრუქტურისა და რეგიონული განვითარების სამინისტროს მუნიციპალური განვითარების ფონდმა განახორციელა.

სენაკში, ჯიხას ქუჩაზე მდებარე, გასული საუკუნის 50-იან წლებში აგებული N5 ბაგა-ბაღის ამორტიზებული შენობის ადგილზე, 60 აღსაზრდელზე გათვლილი, სააღმზრდელო დაწესებულება აშენდა. შენობა ადაპტირებულია შეზღუდული შესაძლებლობების მქონე პირთათვის. პროექტი მუნიციპალური განვითარების ფონდმა განახორციელა.

2018-2021 წლებში, სენაკის მუნიციპალიტეტის მასშტაბით განხორციელდა საჯარო სკოლების  რეაბილიტაციის 22 პროექტი; ცენტრალური გათბობის სისტემით 8 საჯარო სკოლა აღიჭურვა; ინტერნეტიზირებულია ყველა სკოლა; 10 წლის შემდეგ, სასწავლო პროცესი განახლდა სენაკის მესამე საჯარო სკოლის მეორე კორპუსში, სასწავლო პროცესი აღდგა კოტიანეთის საუკუნოვან საჯარო სკოლაში.

2018-2021 წლებში აშენდა თანამედროვე სტანდარტების შესაბამისი 4 ახალი საბავშვო ბაღი; ქალაქად და სოფლად რეაბილიტირდა, კეთილმოეწყო, განახლდა და ახალი ინვენტარით აღიჭურვა 27-ვე საბავშვო და ბაგა-ბაღი.

დასრულების ფაზაშია 100 აღსაზრდელზე გათვლილი N4 საბავშვო ბაღის სამშენებლო სამუშაოები, რომელიც ლტოლვილთა დანიის საბჭოსა და საქართველო-გერმანიის ფინანსური თანამშრომლობით ხორციელდება.

ასევე უახლოეს პერიოდში დაიწყება წლის უანალოგო პროექტის, მესამე საბავშვო ბაღის სამშენებლო სამუშაოები, რომელსაც მუნიციპალური განვითარების ფონდი განახორციელებს.