„ნაციონალური მოძრაობის“ ზუგდიდის ოფისში ორი ფრთა ერთმანეთს უპირისპირდება. ამჯერად ახალაიების გუნდი დაწინაურდა და ზუგდიდის არჩევნებზე პასუხისმგებლობა აკო მინაშვილს დააკისრეს, რომელიც დირექტივებს დათა და ბაჩანა ახალაიებისგან იღებს. ახალაიების ჯგუფის დაწინაურების პარალელურად „ნაციონალური მოძრაობის“ ოფისში ანა წითლიძემ და ზაზა გოროზიამ მეორე ადგილზე გადაინაცვლეს. თუ პირველი ტურის დროს გადაწყვეტილებებს გოროზია და წითლიძე იღებდნენ, ამჯერად ისინი აკო მინაშვილმა ჩაანაცვლა.

მინაშვილის დაწინაურება გოროზიასა და წითლიძისთვის მისაღები არ აღმოჩნდა, ისინი ღიად არა, მაგრამ კულუარულ საუბრებში პატიმარ მიხეილ სააკაშვილს ამ გადაწყვეტილებას არ უწონებენ და ახალაიების აღზევებით უკმაყოფილოები არიან. გოროზია-წითლიძის დუეტი პარტიაში ღიად აცხადებს, რომ ახალაიების გუნდის წინ წამოწევა მათ რეპუტაციას დააზარალებს.

როგორც „ნაციონალური მოძრაობიდან“ ინფორმირებული წყარო გვატყობინებს, აკო მინაშვილს დაევალა ყოფილი ძალოვნების მობილიზება და არჩევნების დღეს უბანზე პროვოკაციების მოწყობა. პროვოკაციულ ჯგუფებს ძალადობით განთქმული ყოფილი ძალოვნები, კუდის ყოფილი უფროსი – რუსლან შამახია, ზუგდიდის ციხის ყოფილი უფროსი – ამირან ჯანაშია და ყოფილი პოლიციელი გიორგი სამუშია უხელმძღვანელებენ, მათ დირექტივებს კი აკო მინაშვილი აძლევს. აკო მინაშვილი როლანდ ახალაიას და მისი შვილების ფრთას წარმოადგენს, მაშინ როცა ახალაიები ყველამ გარიყა, სწორედ აკო მინაშვილი იყო ერთ-ერთი პოლიტიკოსი ენმ-დან, ვინც ბაჩო, დათა და როლანდ ახალაიებს იცავდა.

წყარო ნაციონალური მოძრაობიდან ყვება, რომ პარტიის ადგილობრივი წევრები უკმაყოფილოები არიან მერის კანდიდატურითაც. ანზორ მელია ამ დრომდე პარტიის ცენტრალურ ოფისში ნამყოფი არაა.