ალექსანდრე მოწერელია საზოგადოება ,,ზუგდიდელის“ წარმომადგენლებს შეხვდა და ქალაქის განვითარების მათეული ხედვის შესახებ მიიღო ინფორმაცია. მთავარი აქცენტი ზუგდიდის იერ-სახის შეცვლაზე გაკეთდა. საუბარი შეეხო უძველესი სასტუმრო ,,ოდიშის“ რესტავრაციის თემას, ასევე, სოფლის მეურნეობის დარგის და მათ შორის, ჩაის კულტურის აღდგენას.

,,ზუგდიდელების“ წარმომადგენლები ჩხოუშიის მიმდებარე ტერიტორიაზე ინფრასტრუქტურის განვითარების, სავაჭრო ობიექტების მოწესრიგებისა და კანალიზაციის საკითხებსაც შეეხნენ. გაიხსენეს ზუგდიდის ისტორიიდან ცნობილი წარმატებული სპორტსმენები და სპორტკომპლექსის აშენების აუცილებლობას გაუსვეს ხაზი.

,,ვფიქრობ, უბნების მიხედვით ინფრასტრუქტურის მოწყობაზე უნდა დავიწყოთ მუშაობა. უახლოეს მომავალში ვგეგმავ, შევქმნა სათათბირო ორგანო, სადაც მოგიწვევთ და ერთობლივად განვიხილავთ რეგიონის განვითარების გეგმებს.

ამავდროულად, გთავაზობთ, რომ მუნიციპალიტეტის თანამშრომლებისა და ინფრასტრუქტურის სამინისტროს წარმომადგენლებთან ერთად, დავათვალიეროთ ქალაქის ცენტრალური ტერიტორიები, რომლის იერსახის შეცვლის შესახებ თქვენი იდეები დღეს წარმოადგინეთ. თითოეული ორგანიზაციისა, თუ მოქალაქის მოსაზრებები, საბოლოოდ, ზუგდიდის განაშენიანების გენერალურ გეგმაში უნდა აისახოს“ – განაცხადა ალექსანდრე მოწერელიამ.