სამეგრელო-ზემო სვანეთის მხარეში სახელმწიფო რწმუნებულის -გუბერნატორის ადმინისტრაციაში 2015 წლიდან-2018 წლის 1 იანვრამდე ხელფასებისა და პრემია-დანამატებისთვის სახელმწიფო ბიუჯეტიდან 1. 750. 957 ათასი ლარი დაიხარჯა.

2015 წელს:

ხელფასებზე გაიცა – 367. 866  ლარი

სახელფასო დანამატებზე -167. 912  ლარი;

პრემიებზე – 36. 967  ლარი.

2016 წელს:

ხელფასებზე გაიცა – 375. 156 ლარი;

სახელფასო დანამატებზე – 204. 183 ლარი;

პრემიებზე – 31. 890 ლარი

2017 წელს:

ხელფასებზე გაიცა – 375. 946 ლარი;

სახელფასო დანამატებზე – 183. 677 ლარი;

პრემიებზე – 7360 ლარი.

2015 წლიდან 2018 წლის 1 იანვრამდე სამეგრელო ზემო სვანეთის გუბერნატორის, ლევან შონიას ხელფასმა და პრემიე-დანამატებმა ჯამში 215. 350 ლარი შეადგინა. ვიცე გუბერნატორმა კობა ქანთარიამ 2015 წლიდან 2018 წლის 1 იანვრამდე ხელფასისა და პრემია-დანამატის სახით ჯამში 152. 200 ლარი აიღო.

გუბერნატორის მოადგილემ კახაბერ რუსიამ 2015 წლიდან 2017 წლის ჩათვლით ხელფასი და პრემია-დანამატი ჯამურად  110. 742 ლარი აიღო. რაც შეეხება სამეგრელო ზემო სვანეთის მხარის გუბერნატორის მეორე მოადგილეს, დავით კოდუას, მან ხელფასი და სახელფასო დანამატის სახით 2017 წელს 45. 203 ლარი აიღო. დავით კოდუას ხელფასისა და სახელფასო დანამატის პარალელურად პრემია არ აუღია.

STV-ს მიერ სამეგრელო-ზემო სვანეთის მხარეში სახელმწიფო რწმუნებულის -გუბერნატორის ადმინისტრაციდან გამოთხოვილი დოკუმენტებიდან ირკვევა, რომ მაღალჩინოსნების მსგავსად სახელფასო პრემია-დანამატებს იღებდნენ შტატიანი და უშტატო თანამშრომლებიც. აღსანიშნავია ისიც, რომ 2015 წელს სახელფასო დანამატები შტატგარეშე მომუშავე თანამშრომლებისთვის არ გაცემულა. შტატით მომუშავე თანამშრომლებზე 2015 წელს სახელფასო დანამატი მხოლოდ იანვრის თვეში არ გაცემულა.

პრემია გუბერნატორზე და გუბერნატორის მოადგილეებზე, ასევე შტატიან და უშტატო თანამშრომლებზე 2015 წლის დეკემბრის თვეში, წინასაახალწლოდ გაიცა.

2015 წელს პრემია გაიცა ასევე აპრილის თვეშიც, თუმცა მხოლოდ შტატგარეშე და შტატით მომუშავე თანამშრომლებზე. 2015 წლის აპრილის თვეში პრემია სახელფასო დანამატთან და ხელფასთან ერთად მიიღო ასევე გუბერნატორის ერთ-ერთმა მოადგილემ კახაბერ რუსიამ.

2016 წელს სახელფასო დანამატები არ მიუღიათ მხოლოდ სამეგრელო-ზემო სვანეთის გუბერნიის შტატგარეშე მომუშავე თანამშრომლებს, თუმცა მათ პრემიები მიიღეს 2016 წლის მარტის, მაისის, აგვისტოსა და დეკემბრის თვეებში.

2017 წელს მაღალი თანამდებობის პირებისა და შტატით მომუშავე თანამშრომლებისგან განსხვავებით არც სახელფასო დანამატი და არც პრემია ერ მიუღიათ სამეგრელო-ზემო სვანეთის მხარიდ გუბერნიის შტატგარეშე მომუშავე თანამშრომლებს.

რაც სეეხება სამეგრელო-ზემო სვანეთის ახალ გუბერნატორს ალექსანდრე მოწერელიას, მან ჯერ მხოლოდ ერთი თვის ხელფასი 2950 ლარი აიღო დანამატის გარეშე.

2018 წელს გაცემული დანამატების შესახებ გამოთხოვილ დოკუმენტში ვკითხულობთ, რომ 1 ოქტომბრის მდგომარეობით დანამატები მიმდინარე წელს მხოლოდ ერთ მაღალჩინოსანზე გაიცა.  სამეგრელო-ზემო სვანეთის მხარის გუბერნატორის პირველმა მოადგილემ ირაკლი ჯიქიამ დანამატის სახით 800 ლარი სექტემბრის თვეში აიღო.

2018 წლის სექტემბრის თვეში სახელფასო დანამატები გაიცა ასევე სამეგრელო-ზემო სვანეთის გუბერნიის შტატით და შტატგარეშე მომუშავე თანამშრომლებზე. 2018 წლის სექტემბრის თვეში გაცემულმა სახელფასო დანამატებმა ჯამურად 5955 ლარი შეადგინა.