მესტიის მუნიციპალიტეტის მულახის თემში არსებულ კულტურული მემკვიდრეობის ძეგლს – თამრო გუჯეჯიანის ჰაგაამს რეაბილიტაციის პირველი ეტაპი ჩაუტარდა. ამის შესახებ ინფორმაციას საქართველოს კულტურული მემკვიდრეობის დაცვის ეროვნული სააგენტო ავრცელებს.

სააგენტოს ცნობით, შესრულებული სამუშოების შედეგად ნანგრევებისაგან გაიწმინდა ინტერიერი, მოიხსნა კედლის დაზიანებული საპირე წყობა; ქვის წყობით აღდგა კედლები, მოეწყო რკინა-ბეტონის ფარული სარტყელი, ხის კონსტრუქციებით მოხდა სართულშუა გადახურვა და მრგვალი ხე-მასალით მოეწყო ყავარის სახურავი.

ცნობისთვის, სვანეთის კულტურული მემკვიდრეობის ძეგლების დაცვისა და მოვლა-პატრონობის სტრატეგიული პროექტის ფარგლებში, კულტურული მემკვიდრეობის დაცვის ეროვნული სააგენტო სარეაბილიტაციო სამუშაოებს მესტიის მუნიციპალიტეტის სხვა სოფლებშიც ახორციელებს, სადაც გასული 4 წლის განმავლობაში უკვე აღდგა 80 – მდე სვანური კოშკი და მაჩუბი.

არსებული მონაცემებით, სვანეთში შემორჩენილი კულტურული მემკვიდრეობის ძეგლებიდან, გადაუდებელ რეაბილიტაციას 150 – მდე კოშკი და მაჩუბი საჭიროებს.სამუშაოები შპს „თაუერს+“-მა შეასრულა.