მონიტორინგის კომიტეტის მომხსენებლების განცხადებები არის გარკვეულწილად ურთიერთსაწინააღმდეგო იმ სხვა რეკომენდაციებთან, რომელიც ჩვენ გვაქვს, – ამის შესახებ საპარლამენტო უმრავლესობის წევრმა ირაკლი ჩიქოვანმა განაცხადა.

„ევროპის საბჭოს საპარლამენტო ასამბლეის მონიტორინგის კომიტეტის მომხსენებლების განცხადებაში ნათლად არის ასახული, რომ ძალიან დიდი პროგრესი აქვს მიღწეული საქართველოს და მათ შორის ევროპის საბჭოს მხარდაჭერითაც. თუმცა, განცხადებები, რომელიც იქ არის მოყვანილი არის გარკვეულწილად ურთიერთსაწინააღმდეგო იმ სხვა რეკომენდაციებთან, რომელიც ჩვენ გვაქვს. ჩვენ დავინახეთ, რომ როდესაც საუბარი იყო დეოლიგარქიზაციასთან დაკავშირებით, მივიღეთ რეკომენდაცია ევროკომისიისგან. ამ საკითხის ერთადერთი საშუალება და მაგალითი არსებობდა დღეს უკვე მოქმედი კანონი უკრაინაში და, შესაბამისად, ჩვენ ეს კანონი ავიღეთ სახელმძღვანელოდ და პრაქტიკულად მისი ანალოგი წარვადგინეთ ვენეციის კომისიაში“,- აღნიშნა ჩიქოვანმა.

27-29 მარტს საქართველოში განხორციელებული ვიზიტის შემდეგ, ევროპის საბჭოს საპარლამენტო ასამბლეის (PACE) მონიტორინგის კომიტეტის თანამომხსენებლებმა, კლოდ კერნმა და ედიტ ესტრელამ ხაზგასმით აღნიშნეს, რომ საქართველო ევროპული ინტეგრაციისკენ მიმავალ გზაზე გზაჯვარედინზე დგას.