ზუგდიდში, აქონდროპლაზიის დიაგნოზის მქონე ბავშვების და მათი მშობლების მხარდამჭერი აქცია გაიმართა. სამოქალაქო აქტივისტები სამხარეო ადმინისტრაციის შენობასთან შეიკრიბნენ. შეკრებილების განცხადებით, მსგავსი აქცია არა მხოლოდ თბილისში, არამედ რეგიონებშიც უნდა ტარდებოდეს. აქციის მონაწილეები საზოგადოებას ჩართულობისკენ მოუწოდებენ.

,,ეს აქცია არის აპოლიტიკური და სირცხვილია პრემიერის განცხადებები. სირცხვილია, როდესაც მერიის მაღალჩინოსნები ასი ათას დოლარიანი ჯიპებით დადიან და დედები შვილების ჯანმრთელობისთვის მედიკამენტის დაფინანსებას ითხოვენ”, – განაცხადა აქციის ერთ-ერთმა მონაწილემ. დღეს, ზუგდიდში კიდევ ერთი აქცია, “მშობლები მშობლებისთვისაა” დაანონსებული. აქციის მონაწილეები ანალოგიური მოთხოვნებით ,,სკეიტ პარკტთან” შეიკრიბებიან.

ხელისუფლების პოზიციით, დაავადების სამკურნალოდ შექმნილი პრეპარატის, „ვოზორიდიტის“ საქართველოში დანერგვა კვლევის ბოლო ფაზის დასრულებამდე არ იგეგმება. შესაძლო რისკებზე საუბრის დროს პრემიერ-მინისტრი არგუმენტად იმ გარემოებას ასახელებს, რომ ამერიკული კომპანიის მიერ შექმნილ წამალს ჯერ არც ერთი ქვეყანა არ აფინანსებს. თუმცა, ცნობილია ისიც, რომ „ვოზორიდიტს“ ავტორიზაცია უკვე მიღებული აქვს ამერიკის და ევროპის მარეგულირებელი უწყებებისგან. მთავრობა პრეპარატის დაფინანსებამდე ჯერ ჯანმოს, მწარმოებელი კომპანიის და სხვა ქვეყნების გადაწყვეტილებებს ელოდება. ამ მიზნით სამუშაო ჯგუფი უკვე შექმნილია. თუმცა დასახელებული არგუმენტები რამდენიმე ევროპული ქვეყნის მაგალითზე კატეგორიულად მიუღებელია მშობლებისთვის.

საქართველოში აქონდროპლაზიით დაავადებული 20-მდე ბავშვი ცხოვრობს. ძვირადღირებული წამალი, რომლის დაფინანსებასაც მშობლები ითხოვენ, 14 წლის ასაკამდე ძვლის სისტემის ზრდას უწყობს ხელს.