ზუგდიდის თეატრი დღეს 156 წლის გახდა
დღეს, ზუგდიდის თეატრი 156 წლის გახდა. სწორედ ამდენიმე წლის წინ დაიდგა ზუგდიდში პირველი წარმოდგენა ,,ძალად ექიმი”
,,მისი შექმნაც ახალგაზრდების გაცხოველებულმა სურვილმა და საჭიროების აუცილებლობამ გამოიწვია. 1868 წელს სწორედ ევროპული დარამატურგია გახდა საწინდარი ზუგდიდში სცენისმოყვარეებს დაედგათ სპექტაკლი “ძალად ექიმი.” მას შემდეგ 156 წელმა განვლო. დადიანის თეატრი საინტერესო რეჟისორების ინტერესის ადგილი ხშირად გამხდარა. ბევრმა ნიჭიერმა მსახიობმა აიდგა ჩვენ თეატრში ფეხი. ზუსტად მათ შექმნეს ჩვენ ქალაქში თეატრალური კულტურა და მათ მიმართ მადლიერების გრძნობა ყოველთვის გვექნება.
ეს გზა, რომელიც თეატრმა განვლო, თავის აღმასვლით, მეტად მნიშვნელოვანია ჩვენი ისტორიისთვის, რადგან მათი დამსახურებით, თეატრი დღესაც ქალაქისთვის საჭირო და მნიშვნელოვანი ფუნქციის მატარებელია.
შენობის უქონლობის მიუხედავად, ბოლო რამდენიმე წლის მანძილზე, თეატრი განვითარების ახალ ფაზაში გადავიდა. ამჟამად თეატრს 16 მოქმედი სპექტაკლი და მეტად განსხვავებული რეპერტუარი აქვს, რომელიც მორგებულია ყველა სეგმენტზე, რაც ჩვენი პირობების ფონზე დიდი წარმატებაა. ასევე ვამაყობთ მაყურებლით, რომელიც ბოლო პერიოდის მანძილზე, ძალიან დაუახლოვდა თეატრს.
საუკუნეების მანძილზე, თეატრი მეტად აქტიურ როლს ასრულებს სამოქალაქო ცხოვრებაში და გარკვეულ წილად, შეიძლება ასე ითქვას, რომ ბრძოლის ველზე დგას ყოველდღიურად. ასევე გვახსოვდეს, რომ პროგრესულ იდეათა დამკვიდრების თვალსაზრისით, თეატრის სახეცვლილება თანამედროვე ეპოქაში და ჩვენი, თითოეული ადამიანის ჩართულობა სათეატრო ხელოვნების პროცესებში მეტად მნიშვნელოვანია წინსვლისთვის.” წერია ზუგდიდის შალვა დადიანის სახელობის პროფესიული სახელმწიფო დრამატული თეატრის მიერ გავრცელებულ განცხადებაში.
ზუგდიდის თეატრისთვის თანამედროვე შენობის მშენებლობას ფონდი ,,ქართუ” ახორციელებს.
