გივი მიქანაძე: სახელმწიფო უნივერსიტეტების რექტორთა 99%-მა დააფიქსირა თავისი პოზიცია, რომ უმაღლესი განათლების აღნიშნული რეფორმა არის მნიშვნელოვანი, საჭირო და მისი განხორციელება აუცილებელია
„უმაღლესი განათლების რეფორმის ეროვნულ კონცეფციასთან დაკავშირებით სახელმწიფო უნივერსიტეტების რექტორთა 99%-მა დააფიქსირა თავისი პოზიცია, რომ ეს არის მნიშვნელოვანი, საჭირო რეფორმა და მისი განხორციელება აუცილებელია. უნივერსიტეტების რექტორების მსგავსად, რეფორმის განხორციელების პროცესში ჩართულობის სრული მზაობა გამოთქვეს ბიზნეს სექტორის წარმომადგენლებმაც“, – აღნიშნულთან დაკავშირებით საქართველოს განათლების, მეცნიერებისა და ახალგაზრდობის მინისტრმა გივი მიქანაძემ მთავრობის ადმინისტრაციაში გამართულ ბრიფინგზე განაცხადა.
მინისტრის თქმით, კონცეფციის საზოგადოებისთვის წარდგენის დღიდან დოკუმენტი საჯაროდ არის გამოქვეყნებული და მასზე ხელი ყველა დაინტერესებულ პირს მიუწვდება.
„დოკუმენტის გასაჯაროებასთან ერთად, ჩვენ გავმართეთ შეხვედრები სხვადასხვა მიზნობრივ ჯგუფთან. პრემიერ-მინისტრის, ირაკლი კობახიძის ინიციატივით, გაიმართა შეხვედრა ყველა სახელმწიფო უნივერსიტეტის რექტორთან, სადაც სამ საათზე მეტი დროის განმავლობაში დეტალურად განვიხილავდით კონცეფციას და მასთან დაკავშირებულ საკითხებს. აღნიშნულ შეხვედრაზე რექტორთა ყველა შეკითხვას გაეცა არგუმენტირებული პასუხი“, – აღნიშნა გივი მიქანაძემ.
მინისტრმა რეფორმის განხორციელების მიზნით, საკანონმდებლო ცვლილებების აუცილებლობაზე ისაუბრა და განაცხადა, რომ მიმდინარე კვირას ცვლილებების პაკეტი საქართველოს პარლამენტს წარედგინება.
„შემდეგი სასწავლო წლის დაწყებამდე, ეროვნული გამოცდების კონტექსტიდან გამომდინარე, მნიშვნელოვანია, კონცეფციის დოკუმენტის საფუძველზე გარკვეული საკანონმდებლო ცვლილებების პირველი ეტაპი განხორციელდეს. სწორედ ამიტომ, ჩვენ მოვამზადეთ, კონცეფციის დოკუმენტიდან გამომდინარე, შესაბამისი საკანონმდებლო ცვლილებები.
მიმდინარე კვირას, მთავრობის საკანონმდებლო ინიციატივის საფუძველზე, დაჩქარებული წესით განხილვისა და დამტკიცების მიზნით, ცვლილებების პაკეტი წარედგინება საქართველოს პარლამენტს, რომელიც თავის მხრივ მომავალ სასესიო კვირას აღნიშნულ ცვლილებებს განიხილავს“, – განაცხადა გივი მიქანაძემ.
მსგავსი სიახლეები
ირაკლი ღარიბაშვილი: 2024 წელს მსოფლიო ტურიზმის დღე საქართველოში აღინიშნება და სიმბოლურია, რომ მისი მთავარი თემა იქნება მშვიდობა და ტურიზმი და რომ სწორედ ჩვენი ქვეყანაა არჩეული ამ მნიშვნელოვანი ღონისძიების ჩასატარებლად
საქართველოს განათლების, მეცნიერებისა და ახალგაზრდობის მინისტრად გივი მიქანაძე დაინიშნა
