სამეგრელოში კორონავირუსის 13 ახალი შემთხვევა გამოვლინდა, 3 – გამოჯანმრთელდა
- სამეგრელო-ზემო სვანეთის რეგიონში სახელმწიფო რწმუნებულის მოვალეობის შემსრულებლის მალხაზ თორიას განცხადებით, რეგიონის მასშტაბით კორონავირუსით ინფიცირების 13 ახალი შემთხვევა გამოვლინდა. გამოვლენილ შემთხვევებთან დაკავშირებით მიმდინარეობს ღრმა ეპიდკვლევა.
“რეგიონის მასშტაბით 26 სექტემბერს გაიტესტა 477 მოქალაქე, დადებითია 13. სამი მათგანი ზუგდიდის მაცხოვრებელია და ე. წ. ოქროს ბირჟის კლასტერს მიეკუთვნება. ერთი ინფიცირებული არის ფოთში მცხოვრები და ადრე გამოვლენილი კოვიდინფიცირებულის მეუღლე. სამი ინფიცირებული გურია – იმერეთიდანაა, ხოლო 6 ოკუპირებული აფხაზეთის გალის რაიონის სოფელ საბერიოს მკვიდრნი არიან ე. წ. საბერიოს კლასტერიდან.
რეგიონის მასშტაბით კოვიდინფიცირებულთა რაოდენობა შეადგენს 72 პირს. 69 პაციენტი მოთავსებულია რუხის კლინიკაში და გადიან მკურნალობას. მათგან 4 მდგომარეობა არის შედარებით მძიმე. ასევე ფოთის კლინიკაში მკურნალობს 39 პაციენტი“, – განაცხადა მალხაზ თორიამ.
საოკუპაციო ხაზზე მდებარე რუხის კლინიკაში, 3 პაციენტი გამოჯანმრთელდა. 1 სენაკი და 2 ოკუპირებული აფხაზეთიდან. რაც შეეხება ანაკლია-განმუხურის საკარანტინე სივრცეებს, იქ 172 მოქალაქე იმყოფება.
