სახელმწიფო რწმუნებულის მოადგილეები ჩხოროწყუს უფასო სასადილოსა და ბაღებში არსებულ ვითარებას გაეცნენ
სამეგრელო-ზემო სვანეთის სახელმწიფო რწმუნებულის მოადგილეები ნინო ვიბლიანი და დავით ვერავა, ადგილობრივი თვითმმართველობის ორგანოებთან ურთიერთობის სამსახურის უფროსის მოადგილესთან და თანამშრომლებთან ერთად, ჩხოროწყუს მუნიციპალიტეტის მერის მოადგილეებს: გოჩა ჩიქოვანსა და ვალერი თოდუას შეხვდნენ და მუნიციპალიტეტში მიმდინარე პროექტების შესახებ დეტალური ინფორმაცია მიიღეს.
სახელმწიფო რწმუნებულის ადმინისტრაციისა და ადგილობრივი ხელისუფლების წარმომადგენლები ესტუმრნენ ასევე ქალაქ ჩხოროწყუსა და ქვედა ჩხოროწყუს საბავშვო ბაღებს და იქ არსებულ საჭიროებებს ადგილზე გაეცნენ. ასევე დაათვალიერეს ქალაქ ჩხოროწყუში არსებული უფასო სასადილო, შეხვდნენ ბენეფიციარებს და მომსახურებისა და მენიუს ხარისხით დაინტერესდნენ.
აღნიშნული სასადილოთი 33 ბენეფიციარი სარგებლობს. მათ უმრავლესობას საკვები სახლში დააქვს, ნაწილი კი იქვე სადილობს. მომავალი წლისთვის აქ როგორც კვების ხარისხის გაუმჯობესება, ასევე ინფრასტრუქტურის მოწყობა იგეგმება.
სახელმწიფო რწმუნებულის ადმინისტრაციისა და მუნიციპალიტეტის მერიის წარმომადგენლებმა დაათვალიერეს ასევე ჩხოროწყუს ისტორიული მუზეუმი და სააქტო დარბაზში კულტურის სფეროს წარმომადგენლებს შეხვდნენ. შეხვედრაზე კულტურის სფეროში დაგეგმილ სიახლეებსა და განსახორციელებელ გეგმებზე ისაუბრეს. ასევე ყურადღება გამახვილდა ბიბლიოთეკების მომსახურების ხარისხის გაუმჯობესებაზე.
შეხვედრას ჩხოროწყუს მერის მოადგილეები, მერიის სამსახურების და ა(ა)იპ-ების ხელმძღვანელი პირები და თანამშრომლები ესწრებოდნენ.
მსგავსი სიახლეები
შს მინისტრის მოადგილეები და საგანგებო სიტუაციების მართვის სამსახურის უფროსი დაკარგულთა ოჯახებთან ერთად სტიქიის ზონაში არსებულ ვითარებას პირადად გაეცნენ. ფოტოგალერეა
ხელისუფლების წარმომადგენლები უფასო სასადილოში არსებულ ვითარებას გაეცნენ
