ოკუპირებული აფხაზეთი: ირაკლი კვარაცხელიამ დაკითხვის ოთახში მოიკლა თავი
აფხაზეთის დეფაქტო საგარეო საქმეთა მინისტრი დაურ კოვე აცხადებს, რომ ირაკლი კვარაცხელიამ თავი დაკითხვის ოთახში მოიკლა. ამის შესახებ მან JAMnews-ის სოხუმელ კორესპოდენტს უთხრა.
დაურ კოვეს განცხადებით, კვარაცხელია რუსმა მესაზღვრეებმა ე.წ. საზღვრის უკანონო კვეთის გამო დააკავეს.
“კვარაცხელია რუსმა მესაზღვრეებმა დააკავეს საზღვრის უკანონო გადაკვეთისთვის. ეს მოხდა 12 მარტს, 16 საათზე და 55 წუთზე. კვარაცხელია სოფელ ნაბაკევში გადაიყვანეს. ის დატოვეს ოთახში, რათა მას განმარტებითი ბარათი დაეწერა. თუმცა, რამდენიმე ხანში იგი ამ ოთახში ჩამომხრჩვალი იპოვეს. ეს ყველაფერი ერთი საათის განმავლობაში მოხდა”, – თქვა დაურ კოვემ.
დაურ კოვე ამბობს, რომ მან სრულიად გაურკვეველ ვითარებაში თავი მოიკლა და ამის დამადასტურებელი კადრებიც არსებობს.
მომხდართან დაკავშირებით განცხადება აფხაზეთის დეფაქტო უშიშროების სამსახურმაც გაავრცელა.
“2019 წლის 10 მარტს რუსეთის ФСБ-ს სასაზღვრო სამმართველოს თანამშრომლებმა საქართველოს მოქალაქე ირაკლი კვარაცხელია დააკავეს, რომელმაც უკანონოდ გადმოკვეთა აფხაზეთის სახელმწიფო საზღვარი. ის გადაყვანილი იყო სასაზღვრო სამმართველოს დანაყოფში. ოთახში მარტო ყოფნისას მან თავი ჩამოიხრჩო. გამოძახებული იყო სამედიცინო პერსონალი, თუმცა ირაკლი კვარაცხელიას გადარჩენა ვერ მოხერხდა”, – წერია განცხადებაში.
სახელმწიფო უსაფრთხოების სამსახურისთვის ცხელი ხაზით მიღებული ინფორმაციით, ოკუპირებულ გალის რაიონში ადგილობრივმა მკვიდრმა, საქართველოს მოქალაქემ, ირაკლი კვარაცხელიამ თავი მოიკლა. კვარაცხელია მანამდე დეფაქტო ხელისუფლებამ დააკავა.
ირაკლი კვარაცხელიას ცხედრის დროულად გადმოცემაზე მუშაობა დაწყებულია.
