სამეგრელოში გარემოს ზედამხედველობის დეპარტამენტს ახალი უფროსი ჰყავს
გეგუთის ციხის ყოფილი უფროსის მოადგილე ბესიკ მაქაცარია, გარემოს ზედამხედველობის დეპარტამენტის სამეგრელო-ზემო სვანეთის სამმართველოს უფროსად დაინიშნა. ამის შესახებ ინფორმაციას STV-ს უწყების პრესსამსახურის თანამშრომელი ლიკა ქოქიაშვილი უდასტურებს.
მაქაცარია ბოლო პერიოდში შსს-ში, შსს იმერეთი რაჭა- ლეჩხუმისა და ქვემო სვანეთის პოლიციის დეპარტამენტში დეტექტივის თანაშემწის თანამდებობაზე მუშაობდა, მოგვიანებით კი შსს სამეგრელო- ზემო სვანეთის პოლიციის დეპარტამენტში დეტექტივის თანაშემწე გამომძიებლის თანამდებობაზე გადმოინაცვლა.
აღნიშნულ თანამდებობას გარემოს დაცვის დეპარტამენტში მაქაცარიამდე ხობის პოლიციის ყოფილი უფროსი ვანო შენგელია მას შემდეგ იკავებდა, რაც გარემოსდაცვითი ზედამხედველობის დეპარტამენტის სამეგრელო-ზემო სვანეთის სამმართველოს უფროსმა ბაკურ გულუამ თანამდებობა 2018 წლის 19 თებერვალს დატოვა.
ჯერჯერობით უცნობია, თუ რა გახდა საკადრო ცვლილების მიზეზი. ასევე უცნობია ამჟამად რა თანამდებობას იკავებს გზდ-ს უკვე ყოფილი უფროსი ვანო შენგელია.
ცნობისათვის, გეგუთის სასჯელაღსრულების დეპარტამენტის უფროსის მოადგილის პოსტს ბესიკ მაქაცარია 2014 წლიდან იკავებდა.
