სენაკის მუნიციპალიტეტის მერია, „მერების შეთანხმება აღმოსავლეთი“ (#CoMEast) ფარგლებში, ევროპის მდგრადი ენერგიის კვირეულს (EUSEW 2023) შეუერთდა.

როგორც მერების შეთანხმების ხელმომწერი მუნიციპალიტეტი, მდგრადი ენერგეტიკის დღეს წელს, პირველად აღნიშნავს.

აქტივობის – „მზე ჩემი მეგობარია“ ფარგლებში, ჟიული შარტავას ქუჩაზე მდებარე მინი სტადიონზე, მზის ენერგიაზე მომუშავე გარე განათება დამონტაჟდა. სპეციალურ მოწყობილობაზე მიერთებული განათების სისტემა, დღის განმავლობაში, მზისგან მიღებული ენერგიის აკუმულირებას ახდენს, საღამოს კი დაგროვილი ენერგიის ხარჯზე ნათდება.

პროექტის მიზანია გარე განათების სექტორიდან ნახშირჟანგის ემისიის შემცირების სტიმულირება.

პროექტის ფარგლებში, მზის ენერგიაზე მომუშავე გარე განათების სისტემის მოწყობა სხვა ლოკაციებზეც არის დაგეგმილი.

ჟიული შარტავას ქუჩაზე მდებარე მინი სტადიონზე, სენაკის მუნიციპალიტეტის მერი, ვახტანგ გადელია და საკრებულოს თავმჯდომარე, საბა ოდიშარია, შესაბამისი სამსახურების წარმომადგენლებთან ერთად იმყოფებოდნენ.