წალენჯიხის მუნიციპალიტეტის მერიამ, პირველად საქართველოში, დანერგა და წარმატებით ახორციელებს პირველკლასელთა კვებით უზრუნველყოფის პროგრამას. ამის შესახებ წალენჯიხის მერიის მიერ გავრცელებულ განცხადებაშია ნათქვამი, რომელსაც უცვლელად გთავაზობთ:

„პროგრამა დაინერგა უმოკლეს ვადაში და მაღალი მნიშვნელობა შეიძინა წალენჯიხის მოსახლეობისთვის. ჩატარებული კვლევების თანახმად, სკოლის მოსწავლეთა 35% არასოდეს იკვებება სკოლაში. 

წალენჯიხის მუნიციპალიტეტი მაქსიმალურად ცდილობს მოაგვაროს ეს პრობლემა და შემდგომში კიდევ უფრო განავითაროს პროგრამა. ამისათვის მერიამ უკვე მიმართა საქართველოს მთავრობას მეორე კლასელთა კვების თანხის მოთხოვნით. სამწუხაროდ ჯერ პასუხი არ მიგვიღია და ვიმედოვნებთ, რომ მთავრობა გაითვალისწინებს ჩვენს თხოვნას.

გამომდინარე იქიდან, რომ პროგრამა საპილოტე რეჟიმში ხორციელდება, მუნიციპალიტეტის მერიაში შეიქმნა მონიტორინგის ჯგუფი, რომლებიც მშობლებთან და ბავშვებთან უშუალო კონტაქტის საფუძველზე იმუშავებენ ხარვეზების აღმოფხვრასა და მშობლების მიერ შემოთავაზებული რეკომენდაციების დანერგვაზე.

მშობლებიდან მოძიებული ინფორმაციის შედეგად, გავარკვიეთ, თუ ძირითადად რა კვების პროდუქტებს ყიდულობენ მოსწავლეები, იყენებენ ბარათს ყოველდღიურად სკოლის სასადილოში, თუ მარკეტში ხდება მათი გამოყენება და პროდუქტის კვირის მარაგის შეძენა. ძირითადად საკვებად მიიჩნევა ცომეული და ტკბილეული, თუმცა არის შემთხვევები, როდესაც მშობლები შაქარს, მარილს და ბურღულეულს ყიდულობენ შვილებისთვის. ეს ფაქტი კიდევ უფრო მეტად ადასტურებს იმას, თუ რამდენად მნიშვნელოვანია ამ პროგრამის დანერგვა არა მხოლოდ წალენჯიხაში, არამედ საქართველოს მასშტაბით.  

გამომდინარე იქიდან რომ ეს ბარათი ახალი პროდუქტია და თიბისი ბანკმა სპეციალურად ჩვენი მუნიციპალიტეტისთვის შექმნა, მუდმივად მიმდინარეობს ბარათის უხარვეზოდ გამოყენების მონიტორინგი და აქტიურად ვთანამშრომლობთ ბანკთან.

მერია მომავალშიც გააგრძელებს პროგრამის მონიტორინგს და კიდევ უფრო მეტ სიახლეს შესთავაზებს წალენჯიხელებს“ – აღნიშნულია წალენჯიხის მერიის მიერ გავრცელებულ განცხადებაში.