მარტვილში დიალიზის სერვისი ამოქმედდა. ამ დრომდე ბენეფიციარებს პროცედურის ჩასატარებლად, კვირაში რამდენჯერმე, კილომეტრების დაშორებით, სხვადასხვა ქალაქში უწევდათ გადაადგილება, რაც ჯანმრთელობის მდგომარეობის გაუარესებასთან, დროსა და ხარჯებთან იყო დაკავშირებული.

სერვისის ამოქმედების შემდეგ, კი ბენეფიციარები სერვისს მათსავე ქალაქში, საცხოვრებელ სახლებთან ახლოს მიიღებენ.

სამედიცინო დაწესებულებები, დიალიზისთვის საჭირო აპარატურით სრულად აღიჭურვა. ჰემოდიალიზის საჭიროების მქონე პირებს, სათანადოდ გადამზადებული მედპერსონალი ყოველდღიურად მოემსახურება.

მარტვილთან ერთად დიალიზის ცენტრები ასევე ახალქალაქში, ყვარლისა და ხულოში ამოქმედდა. დიალიზის სერვისი მიღება უახლოეს მომავალში სენაკში, წალენჯიხაში, ჭიათურაში, საგარეჯოში, ტყიბულში, ცაგერში, წნორში და დედოფლისწყაროშიც იქნება შესაძლებელი, რის შედეგადაც გეოგრაფიული მოცვა გაიზრდება და საჭირო სერვისის მიღებას ბენეფიციარები შეუფერხებლად შეძლებენ. მანამდე კი სერვისი ამოქმედდა რუხის მრავალფუნქციურ სამედიცინო ცენტრსა და მესტიის საავადმყოფოში.

ინფორმაციას ჯანდაცვის სამინისტრო ავრცელებს.