შინაგან საქმეთა მინისტრის გიორგი გახარიას განცხადებით, პოლიცია არჩევნებში ვერ ჩაერევა, პოლიცია იქნება ყველა ადამიანის უფლებების დამცველი და კანონის დარღვევა პოლიციის მხრიდან იქნება აღკვეთილი. ამის შესახებ გახარიას ჟურნალისტის კიტხვის საპასუხოდ განაცხადა და აღნიშნა რომ როგორც შინაგან საქმეთა მინისტრის მიზანი გახლავთ კიდევ ერთხელ გადაამოწმოს უსაფრთხოების კონტექსტში რა ხდება რეგიონში.

“მოგეხსენებათ, რომ შინაგან საქმეთა სამინისტრო უზრუნველყოფს მშვიდ და უსაფრთხო გარემოს არჩევნების ჩასატარებლად. ჩვენ ეს შევძელით პირველ ტურში, ასევე შევძლებთ მეორე ტურში. ჩემი ვიზიტის მიზანი იყო უსაფრთხოების კონტექსტში, როგორ ჩატარდა არჩევნები სამეგრელოში. რა უნდა გავაკეთოთ იმისთვის რომ ჩვენი მოქალაქეების უსაფრთხოების ხარისხი მშვიდობიანი არჩევნების ჩატარების კონტექსტში კიდევ უფრო გავზარდოთ.

მე ავიღე კურატორობა მთელ საქართველოში არჩევნების მშვიდად ჩატარების, ეს მე დამავალა პრემიერ-მინისტრმა. პოლიცია არჩევნებში ვერ ჩაერევა, პოლიცია იქნება ყველა ადამიანის უფლებების დამცველი და ყველა კანონის დარღვევა პოლიციის მხრიდან იქნება აღკვეთილი,”-განაცხადა გახარიამ.

“თუ ამომრჩევლის მოსყიდვის ფაქტები დადასტურდა ამაზე რა თქმა უნდა შინაგან საქმეთა სამინისტრო მოკვლევას აუცილებლად დაიწყებს,”- ასე უპასუხა შინაგან საქმეთა მინისტრმა გიორგი გახარიამ ე.წ. სიებთან და ამომრჩევლის მოსყიდვასთან დაკავშირებით დასმულ კითხვას.

მისივე თქმით, რაც შეეხება ქურდულ მენტალიტეტს, მინისტრის მტკიცებით, შსს მას ებრძოდა, ახლაც ებრძვის და მომავალშიც შეებრძოლება.