შალვა კერესელიძე ზუგდიდში: ოჯახურ ღირებულებებთან მიმართებით მმართველი პარტიის სულისკვეთებას ვიზიარებ
„ვიზიარებ მმართველი პარტიის სულისკვეთებას ოჯახურ ღირებულებებთან მიმართებით. თუმცა ჩვენი გუნდი – გიორგი გახარიას გუნდი მეტ მხარდაჭერას მოვითხოვთ სახელმწიფოს მხრიდან ქართული ოჯახების განმტკიცებისთვის“, – განაცხადა საპარლამენტო პოლიტიკური ჯგუფი „საქართველოსთვის“ წევრმა შალვა კერესელიძემ „საქართველოს კონსტიტუციაში ცვლილების შეტანის შესახებ“ და „ოჯახურ ღირებულებათა და არასრულწლოვანთა დაცვის შესახებ“ კონსტიტუციური კანონპროექტების საყოველთაო-სახალხო განხილვისას ზუგდიდში.
შალვა კერესელიძის თქმით, ისტორიულად, ოჯახი და ოჯახის ინსტიტუცია იყო ის მძლავრი ხერხემალი, რომელიც სახელმწიფოს აძლიერებდა.
„ქართველი კაცისთვის ოჯახური ღირებულებები და ფასეულობები განსაკუთრებული და გამორჩეულია. ეს საბოლოო ჯამში, ინდივიდებამდე დადის და თითოეულ ოჯახს თავისი ღირებულებები და ფასეულობები გააჩნია. არსებობს შესაძლებლობა იმისა, რომ მოქმედ კანონმდებლობაში სხვადასხვა ფორმით შევიდეს ისეთი ცვლილებები, რომელიც ხელს შეუწყობს ქართული ოჯახების დაცვას და გაძლიერებას. საქართველო ყოველ წელს ბუნებრივი მატების გარეშე ხვდება, სიკვდილიანობის მაჩვენებელმა გადააჭარბა შობადობის მაჩვენებელს. შემცირებულია ქორწინებები, გაზრდილია მიგრაცია – ქვეყნიდან გადიან ადამიანები, რომელთაც შეუძლიათ მნიშვნელოვანი წვლილი შეიტანონ ქვეყნის აღმშენებლობაში. ქართული გენოფონდი დაბერების პროცესშია, 200-ზე მეტი სოფელია საქართველოში, სადაც ადამიანი აღარ ცხოვრობს და ერთი ამდენია, სადაც თითო-ოროლა კაცი ცხოვრობს. მე წარმოვადგენ იმ რეგიონს, სადაც ეს პროცესები უმძიმესად მიმდინარეობს. მოდით, ამ პრობლემების მოგვარებაზე ვიმსჯელოთ. საქართველოს კონსტიტუციაში არის შესანიშნავი ჩანაწერი, რომ საქართველოს ხელისუფლება უზრუნველყოფს ქვეყნის დემოგრაფიულ ხელშეწყობას“, – განაცხადა შალვა კერესელიძემ.
ამავე თემაზე:
