პარლამენტი დაჩქარებული წესით განიხილავს მთავრობის ინიციატივას, რომელიც ადმინისტრაციული სახდელისგან იმ პირთა გათავისუფლებას ითვალისწინებს, რომლებმაც კოვიდპანდემიის დროს, 2021 წლის 23 ივნისიდან 2023 წლის 4 ივლისის პერიოდში დაარღვიეს იზოლაციისა და კარანტინის წესი, ასევე, პირბადის ტარების წესი.

„ადმინისტრაციული სახდელისგან გათავისუფლების შესახებ“ და „ამნისტიის შესახებ“ კანონებში დაგეგმილ ცვლილებებს პარლამენტის ევროპასთან ინტეგრაციისა და ჯანდაცვისა და სოციალურ საკითხთა კომიტეტების ერთობლივ სხდომაზე დღეს განიხილავენ. ადმინისტრაციული სახდელისგან 1 893 ადამიანი გათავისუფლდება. თანხის ჯამური ოდენობა კი 5 596 047 ლარია.