სახელმწიფო პროგრამის ფარგლებში წალენჯიხის მუნიციპალიტეტში, საგანმანათლებლო ინფრასტრუქტურის მშენებლობა რეაბილიტაციის პროცესი აქტიურად მიმდინარეობს. ინფორმაციას სამეგრელო-ზემო სვანეთის სახელმწიფო რწმუნებულის ადმინისტრაცია ავრცელებს.

წალენჯიხის მეხუთე საჯარო სკოლაში (ზღვაიას უბანი) და წყოუშის საჯარო სკოლაში სამშენებლო პროცესს დღეს სამეგრელო-ზემო სვანეთის სახელმწიფო რწმუნებული დავით ვერავა, მოადგილესთან ლუდუკ ხასიასთან და წალენჯიხის საგანმანათლებლო რესურსცენტრის ხელმძღვანელთან ლირა ღურწკაიასთან ერთად გაეცნო.

წყოუშისა და წალენჯიხის მე-5 საჯარო სკოლები 120 მოსწავლეზე იქნება გათვლილი. წყოუშის საჯარო სკოლა საოკუპაციო ხაზთან ახლოს მდებარეობს, ამ სკოლაში მოსწავლეები ოკუპირებული საბერიოდანაც დადიან, მანამდე არსებული სკოლა კი ავარიული იყო და ვერ აკმაყოფილებს სტანდარტებს, ასევე ავარიული იყო წალენჯიხის მეხუთე საჯარო სკოლის შენობაც. წალენჯიხაში ასევე შენდება საჩინოს #1 საჯარო სკოლის შერწყმული საბაზო სკოლა, რომლის სამშენებლო სამუშაოებს ასევე დავით ვერავა გაეცნო. სკოლების მშენებლობის პროცესს, საქართველოს განათლების, მეცნიერებისა და ახალგაზრდობის სამინისტროს, საგანმანათლებლო და სამეცნიერო ინფრასტრუქტურის განვითარების სააგენტო ახორციელებს.

წალენჯიხაში ქალაქის და სოფლების მასშტაბით, ასევე მიმდინარეობს საბავშვო ბაღების რეაბილიტაციის პროცესი.