9 მარტს, სენაკის თეატრში ახალგაზრდა რეჟისორ გიორგი ჭანტურიას სპექტაკლის ,,უკანასკნელი თოლია” ჩვენება გაიმართება.

პიესის ავტორი მიხო მოსულიშვილია, გიორგი ჭანტურია რეჟისორთან ერთად სპექტაკლის მხატვარიცაა. უკანასკნელი თოლია გიორგი ჭანტურიამ თეატრ ,,მოდი ნახეში” დადგა, ეს მისი სადებიუტო სპექტაკლია. გიორგი ჭანტურია წლების განმავლობაში სწორედ სენაკის თეატრში მსახიობად მოღვაწეობდა.

სპექტაკლში ვითარება სოხუმის დაცემის პარალელურად ვითარდება. 1993 წლის 27 სექტემბერს სოხუმი დაეცა, საქართველოს ეროვნული გმირი, აფხაზეთის ავტონომიური რესპუბლიკის მინისტრთა საბჭოს თავმჯდომარე ჟიული შარტავა და მისი თანამებრძოლები სიცოცხლის ფასად  იცავდნენ საქართველოს ტერიტორიულ მთლიანობას.

უახლოესი ისტორიული ფაქტების მიხედვით აღდგენილი რეალობა განსაკუთრებით ემოციებს იწვევს მაყურებელში. მისი ჩვენება სენაკში ჟიული შარტავას კვირეული ფარგლებში გაიმართება, მიმდინარე წლის 7 მარტს ჟიული შარტავას დაბადებიდან 81 წელი სრულდება. ჟიული შარტავა 1945 წლის 7 მარტს სენაკში, პედაგოგების კალისტრატე და ნინო შარტავების ოჯახში დაიბადა. მან სენაკის მეორე საჯარო სკოლა დაამთავარა, რომელიც ამჟამად ეროვნული გმირის სახელობისაა.