საქართველოს ეროვნული მნიშვნელობის კულტურული მემკვიდრეობის ძეგლის, ჭაქვინჯის ციხე – სიმაგრის კონსერვაცია – გადარჩენითი ხასიათის სამუშაოების პროექტირებაზე ტენდერი გამოცხადდა.

სამუშაოების თირებულება 285 ათას ლარს შეადგენს და ის ხელშეკრულების გაფორმებიდან 7 თვის განმავლობაში უნდა დასრულდეს. 

ტენდერი კულტურული მემკვიდრეობის ეროვნულმა სააგენტომ გამოაცხადა.

სატენდერო დოკუმენტაციაში ვკითხულობთ:

,,ტენდერის მიზანია ჭაქვინჯის ციხის კვლევითი, საფიქსაციო სამუშაოების განხორციელებისა და რეაბილიტაციის საპროექტო-სახარჯთაღრიცხვო დოკუმენტაციის მომზადება, რაც სამომავლოდ გახდება ფიზიკური სამუშაოების განხორციელების საფუძველი. 

ჩასატარებელმა სამუშაოებმა უნდა უზრუნველყოს ძეგლზე არსებული მდგომარეობის აუცილებელი ყველა ასპექტის გამოსწორება, რომელიც გამორჩეულად ფაქიზ მიდგომას მოითხოვს, კარგად გამართულ მეთოდოლოგიურ ხელმძღვანელობას, სწორ კონსტრუქციულ და მაღალპროფესიულ მხატვრულ გადაწყვეტას.

პირველ ეტაპზე, სრულყოფილი კვლევა-ფიქსაციის სამუშაოების (3D სკანირება, გარკვეული მონაკვეთების ტრადიციული მეთოდით ანაზომების შესრულება, კედლების ზონდაჟები, საჭიროებისამებრ ხარაჩოების განთავსება, ფუძე-გრუნტებისა და დაფუძნების საინჟინრო-გეოლოგიური კვლევა, არსებული სამშენებლო მასალების კვლევა და სხვ.) განხორციელებისთვის, საპროექტო და მიმდებარე ნაწილის მწვანე საფარისგან (ხე-ბუჩქნარი) გაწმენდითი სამუშაოები უნდა განხორციელდეს შესაბამისი ტექნოლოგიების გამოყენებით. 

ძეგლის გაწმენდითი და კვლევითი სამუშაოები უნდა განხორციელდეს არქიტექტორ-რესტავრატორისა და არქეოლოგის ზედამხედველობით” ნათქვამია სატენდერო დოკუმენტში.

კვლევის მიზნით ძეგლზე განსახორციელებელი ფიზიკური სამუშაოები უნდა შესრულდეს კულტურული მემკვიდრეობის ძეგლზე კვლევითი სამუშაოების ნებართვის საფუძველზე.