10 და 11 აგვისტოს, ზუგდიდში დრიფტის ჩემპიონატის მეოთხე ეტაპი გაიმართება, სადაც ქვეყნის საუკეთესო დრიფტერები საქართველოს ჩემპიონობისთვის იბრძოლებენ. საპრიზო ადგილზე გასული მონაწილეები ფულადი პრიზებით დაჯილდოვდებიან. ინფორმაციას ზუგდიდის მერია ავრცელებს:

„აღნიშნულთან დაკავშირებით, 2025 წლის 8 აგვისტოს 16:00 სთ-დან, 12 აგვისტოს 14:00 სთ-მდე იკრძალება ავტოტრანსპორტის მოძრაობა თბილისი-სენაკი-ლესელიძის 330-ე კილომეტრზე (ქალაქ ზუგდიდის ტერიტორია, ნინოშვილის ქუჩის კვეთიდან ოდიშის ქუჩის კვეთამდე მონაკვეთი) და ზუგდიდი-ჯიხაშკარი-ჩხოროწყუს საავტომობილო გზის კმ1 მონაკვეთზე.

მოძრაობის აკრძალვის პერიოდში ავტოტრანსპორტი იმოძრავებს შემოვლითი გზით. კერძოდ, ნინოშვილის, გორკის, სართანიას, ბერიას (შიდასახელმწიფოებრივი მნიშვნელობის ზუგდიდი-ჯიხაშკარი-ჩხოროწყუს საავტომობილო გზის მონაკვეთი) და ოდიშის ქუჩების გამოყენებით.

მხარდამჭერი ორგანიზაციები: საქართველოს კულტურის, სპორტისა და ახალგაზრდობის სამინისტრო, ზუგდიდის მუნიციპალიტეტის მერია, Georgian Automobile Sport Federation, betlive Racing Season, Georgian Drift Serie 2024, BMW Club Georgia“ – ნათქვამია გავრცელებულ ინფორმაციაში.