გაბზარული კედლები, ხავსმოკიდებული სახლის საყრდენი ბოძები, ახდილი სახურავი, ღობის გარეშე დარჩენილი ნამოსახლარი, საღორედ ქცეული საცხოვრებელი სახლის პირველი სართული და ფანჯრის გარეშე დარჩენილი ოთახი – ასე გამოიყურება ადგილი, სადაც საქართველოს პირველმა პრეზიდენტმა ზვიად გამსახურდიამ სიცოცხლის ბოლო სამი დღე გაატარა.

1993 წელი. ლოკაცია ხობის მუნიციპალიტეტი. სოფლის სახელწოდება – ძველი ხიბულა. მასპინძელი კარლო ღურწკაია. რაც დღეს ახსოვს და ხმამაღლა ამბობს არის ის რომ გამთენიისას მეუღლემ გააღვიძა. სახლის მეორე სართულზე “ბიჭები ყვიროდნენ”. ადგილზე მისულმა პრეზიდენტი იატაკზე სისხლიანი ნახა.

თავი მოიკლა თუ მოკლეს?!- ამის შესახებ ვერსიის დონეზეც არ საუბრობს. იგონებს მხოლოდ იმას რომ სამი დღის მანძილზე ზვიად გამსახურდიას მხოლოდ ერთი ჭიქა ჩაითი გაუმასპინძლდა. შემდეგ მოხდა ის რაც მოხდა – 31 დეკემბერი. საეჭვო გარდაცვალება, რომლის შესახებაც პასუხი ვერცერთი ხელისუფლების პირობებში ვერ მოიძებნა. საქმე ახლაც ძიებაშია. საგამოძიებო დეტალების შესახებ უახლოეს მომავალში მოგაწვდით ინფორმაცის, ახლა კი თავად სახლის შესახებ გიამბობთ.

მას შემდეგ რაც, ხობის რაიონის სოფელ ძველ ხიბულაში მდებარე კარლო ღურწკაიას სახლში 1993 წლის 31 დეკემბერს ზვიად გამსახურდია საეჭვოდ გარდაიცვალა ამ მისტიურ ლოკაციაზე კიდევ ერთი უბედური შემთხვევა მოხდა, რამაც ღურწკაიების ხიბულიდან გამოსახლება განაპირობა. სახლი ადამიანების გარეშე დარჩა. თონე გაცივდა. მინდვრებს ასფალტებიც დაეხეთქათ. ღობე მოინგრა. სახლს დააწვიმა. ფანჯრები ჩაიმსხვრა. კარები გასახლებულმა მეპატრონემ თან წაიღო. ერთდაერთი რაც დარჩა და რასაც დრო ინახავს ისტორიაა – ისტორია იმის შესახებ რომ ზვიად გამსახურდიამ სიცოცხლის ბოლო წუთები ამ მისტიურ სახლში გაატარა. სახლში რომელიც ახლა ნასახლარია.

ზუსტად 22 წლის შემდეგ 2015 წლის 31 დეკემბერს სახლი შეიძინეს ეროვნული მოძრაობის წევრებმა, რომელთა სახელით სახლის ახალმა მეპატრონემ ნუგზარ შონიამ 2018 წლის 21 მაისს თხოვნით მიმართა კულტურის სამინისტროს სახლისთვის მიენიჭებინათ კულტურის ძეგლის სტატუსი. 2018 წლის 3 აგვისტოს საქართველოს კულტურული მემკვიდრეობის დაცვის ეროვნული სააგენტოს გენერალური დირექტორის ნიკა ანთიძის №02/47 ბრძანების საფუძველზე სოფელ ძველ ხიბულაში მდებარე ზვიად გამსახურდიას მემორიალურ სახლს მიენიჭა უძრავი ძეგლის სტატუსი.

საინიციატივო ჯგუფის წევრების აზრით აღნიშნულ ადგილზე უნდა შეიქმნას ეროვნულ-განმანთავისუფლებელი მოძრაობის მემორიალური კომპლექსი სახელწოდებით „კოლხური კოშკი ძველ ხიბულაში“. ეროვნული მოძრაობის წევრებმა სახლის რეაბილიტაციასთან დაკავშირებით, 2016 წელს ხობის მუნიციპალიტეტის გამგეობას დახმარების თხოვნით მიმართა, თუმცა დღემდე მოლოდინის რეჟიმში არიან.

კადრებში აღბეჭდილი რეალობა მწარეა, სურათი მძიმე – ასე გამოიყურება ადგილი, სადაც საქართველოს პირველმა პრეზიდენტმა ზვიად გამსახურდიამ სიცოცხლის ბოლო სამი დღე გაატარა.