სამეგრელოში საკადრო ცვლილებებზე საუბრობენ, რომელიც ძირეულად შეეხება როგორც მთლიანად რეგიონის ადგილობრივ ხელისუფლებას, ასევე ცალკეულ მუნიციპალიტეტებსაც. ძალიან ბევრი მითქმა-მოთქმაა სამეგრელოს რეგიონში გუბერნატორის შეცვლის საკითხზეც, თუმცა ამ ეტაპზე ამის შესახებ დაზუსტებული ინფორმაცია არ არსებობს.

უკვე გარკვეულია, რომ თანამდებობებს დატოვებს სამეგრელოს 4 გუბერნატორის მოადგილიდან მხოლოდ სამი. მალხაზ თორია, ირაკლი ჯიქია და კობა ქანთარია თანამდებობებს სავარაუდოდ ერთ კვირაში დატოვებენ. რაც შეეხება ნინო ვიბლიანს, ის თანამდებობას იმავე პოზიციაზე შეინარჩუნებს.

STV-ს წყაროს ცნობით, ირაკლი ჯიქია სავარაუდოდ ისევ იმ უწყებაში გადაინაცვლებს, საიდანაც ის აღნიშნულ თანამდებობაზე მოვიდა, თუმცა ჯერ გაურკვეველია, ისევ სამეგრელო-ზემო სვანეთის სამხარეო პოლიციას დაუბრუნდება თუ სხვა რეგიონს. მალხაზ თორია კი გუბერნატორის მოადგილეობიდან შესაძლოა რეგიონის სუსის მერთ-ერთ მაღალ თანამდებობაზეც აღმოჩნდეს.

საკადრო ცვლილებები სამეგრელოს რეგიონში შემავალი 9 მუნიციპალიტეტიდან სავარაუდოდ სამს შეეხება. ძირითადად მერის მოადგილეებს და თავად მერებსაც კი. ახალი საკადრო ცვლილებების განხორციელების შემდეგ შესაძლოა თანამდებობა ფოთის, სენაკისა და წალენჯიხის მერებმაც დატოვონ.

როგორც STV-თან სამთავრობო წყაროები აღნიშნავენ, საკადრო ცვლილებების მიზეზი ადგილობრივი თვითმმართველობების სუსტი მუშაობა და უმოქმედობაა, რომელიც უფრო ძლიერი და საიმედო კადრებით უნდა ჩანაცვლდეს.

აქვე ვრცელდება ინფორმაცია ახალ კადრებზე. გუბერნატორის ახალ მოადგილეებად ზუგდიდელი დავით ვერავა და “ქართუ ჯგუფის” თანამშრომელი ვიმე ხასაია სახელდება. გუბერნიაში ზუგდიდის მერის ყოფილი მოადგილე, მაიზერ ნანავაც დაიკავებს მაღალ თანამდებობას, თუმცა ჯერჯერობით უცნობია, თუ რა პოზიციაზე მოუწევს მას მუშაობა.

ცნობისთვის, აღნიშნული საკადრო ცვლილებები სამეგრელოს რეგიონში სექტემბრისთვის იყო დაგეგმილი, თუმცა აღნიშნულ ამბებს რეგიონში მინიმუმ ერთ კვირაში უკვე ელოდებიან.