ზუგდიდის ინფექციურ საავადმყოფოში მოთავსებული ქალის მდგომარეობა ამ დროისთვის სტაბილურია. გარდა ამისა, საავადმყოფოში რჩება კორონავირუსით ინფიცირებული 67 წლის მამაკაცი და ერთი პაციენტიც, რომელსაც ექიმები ამ დრომდე აკვირდებიან. ამის შესახებ ჟურნალისტებს ექიმ-ინფექციონისტმა ლალი დარახველიძემ ბრიგინგზე განუცხადა.

“გვყავს სამი პაციენტი, მათ შორის ერთი დადასტურებული შემთხვევა, რომლის ჯანმრთელობის მდგომარეობა დამაკმაყოფილებელია. ერთი არის დაკვირვების ქვეშ და მისი მდგომარეობა გაუმჯობესებულია. გვაქვს ერთი ახალი შემთხვევა, რომელსაც აქვს მოგზაურობის ისტორია. პაციენტი შემოყვანილ იქნა აფხაზეთის ტერიტორიიდან ჩივილებით ცხელება, ხველა. საერთო მდგომარეობა სტაბილურია. პაციენტის ბიოლოგიური მასალა გადაგზავნილია ლუგარის ლაბორატორიაში კვლევის მიზნით. ანალიზების პასუხი დღეს გახდება ცნობილი”-აცხადებს ლალი დარახველიძე.

ცნობისთვის, გალიდან გადმოყვანილ პაციენტს აქვს მოგზაურობის ისტორია. მასთან ერთად იმყოფებოდა ეროვნებით რუსი მამაკაცი, რომელიც სოხუმის საავადმყოფოშია გადაყვანილი. ახალგაზრდა ქალი რამდენიმე დღის წინ მოსკოვში იმყოფებოდა.