• საქართველოს ბანკის შეიარაღებულ თავდასხმაში სავარაუდო ეჭვმიტანილის ბადრი ესებუას ოჯახის ნათესავი, მამია ილარდავა ამბობს შინაგან საქმეთა სამინისტროს თანამშრომლებმა ბადრი ესებუას საცხოვრებელ სახლში ჩხრეკა ჩაატარეს და სახლის მიმდებარე ტერიტორიაზე როგორც საგამოძიებო, ისე სამძებრო სამუშაო მიმდინარეობდა.

მისივე თქმით, სამართალდამცველებმა ოჯახის წევრებიც გამოკითხეს. ილორდავა არ გამორიცხავს და არც უარყოფს რომ შესაძლოა ბადრი ესებუა იყოს ბოროტმოქმედი და ამ თემაზე გამოძიება უკვე მუშაობს და შედეგებს ელოდება. როგორც მამია ილორდა, ისე ბადრი ესებუას ბიძაშვილი ელენე ესებუა სხვა ბანკის თანამშრომლები არიან.

ცნობისთვის, შინაგან საქმეთა სამინისტრომ განცხადება გაავრცელა, სადაც აღნიშნულია რომ ჩატარებული კომპლექსური საგამოძიებო-ოპერატიული და სამძებრო ღონისძიებების შედეგად, ყაჩაღური თავდასხმაში მონაწილე დამნაშავე პირის ვინაობა დაადგინა და ის იდენტიფიცირებულია.

შინაგან საქმეთა სამინისტრო მიმართავს მედიასაშუალებებს და საზოგადოების ყველა წევრს, თუ სხვადასხვა წყაროებით მათთვის ცნობილი გახდა დანაშაულის ჩამდენი პირის ვინაობა და ფოტოსურათი, არ გაავრცელონ აღნიშნული ინფორმაცია, რადგან ეს ხელს შეუშლის მიმდინარე საგამოძიებო ღონისძიებებს. პოლიციის მიერ იდენტიფიცირებული პირის ადგილსამყოფელის დადგენის და მისი დაკავების მიზნით სამართალდამცველების მიერ სპეციალური ოპერატიული, საგამოძიებო და სამძებრო მოქმედებები ამ დრომდე აქტიურად მიმდინარეობს.

მომხდარ ფაქტზე გამოძიება სისხლის სამართლის კოდექსის 179-ე, 236-ე და 144-ე მუხლებით გრძელდება. 21 ოქტომბერს, “საქართველოს ბანკის” ზუგდიდის ფილიალში შეიარაღებულმა პირმა ბანკის ანამშრომლები მძევლად აიყვანა. ის ნახევარ მილიონ დოლარს ითხოვდა და უსაფრთხოების გარანტიას, წინააღმდეგ შემთხვევაში დატყვევებულთა დახოცვით იმუქრებოდა.

მძევლების გათავისუფლების ოპერაცია 8 საათზე მეტ ხანს გაგრძელდა. თავდამსხმელმა შენობა 3 მძევალთან ერთად დატოვა, მათ შორის იყო სამეგრელო-ზემო სვანეთის პოლიციის დეპარტამენტის უფროსი ავთანდილ გალდავა. შეიარაღებული პირი დაკავებული არ არის.