სენაკი, პანდემიით გამოწვეული ერთწლიანი ინტერვალის შემდეგ, დღეს, მეშვიდედ მასპინძლობს სრულიად საქართველოს კათოლიკოს-პატრიარქის, ილია II-ის პატრონაჟითა და სენაკის მუნიციპალიტეტის მერიის მხარდაჭერით მიმდინარე ტრადიციულ მუსიკალურ ფესტივალს.

ქალაქის ცენტრალურ პარკში, ღია ცის ქვეშ, ,,სენაკის არტ-ფესტივალი 2021’’, საყოველთაოდ ცნობილმა ვოკალურმა ჯგუფმა, ,,The Quintessence’’ გახსნა.

ქართული ჯაზ-სექსტეტი, რომელიც არსებობის 9 წლის მანძილზე, მსოფლიოს არაერთი პრესტიჟული კონკურსისა და პოლიფონიური ფესტივალის გამარჯვებული და ლაურეატი გახდა, ფესტივალის ფარგლებში, უკვე მეორედ ესტუმრა სენაკს.

ფესტივალის გახსნას სენაკის მუნიციპალიტეტის მერის პირველი მოადგილე გრიგოლ ბაღათურია, ადგილობრივი თვითმმართველობის, მუსიკალური სექტორისა და საზოგადოების წარმომადგენლები ესწრებოდნენ.

7 წლის მანძილზე, სენაკის ფესტივალმა, საქართველოს მასშტაბით, ბევრი ნიჭიერი ნორჩი მუსიკოსი გამოავლინა; უმასპინძლა საყოველთაოდ ცნობილ მომღერლებს, მუსიკოსებსა და შემოქმედებით ჯგუფებს; თავი მოუყარა საქვეყნოდ ცნობილ ხელოვანებს: ნანი ბრეგვაძეს, ვაჟა აზარაშვილს, ანიტა რაჭველიშვილს, ნინო ქათამაძეს, ვიკა ჩაპლინსკაიას, მანუელა მარია გლოკს, ნატალია კაზიმიროვსკაიას, ირმა სოხაძეს, ნუკრი კაპანაძეს, ეკა მამალაძეს, ვოკალურ ჯგუფს ,,The Quintessence”, გიორგი ცაგარელს, ტარიელ სუარს, ია ფარულავას, გია ყანჩელის სახელობის სიმებიან კვარტეტს, ანსამბლ ,,ფორტეს’’, თათული ედიშერაშვილს, სვეტიცხოვლის მგალობელთა გუნდს, ჩხოროწყუს სიმღერისა და ცეკვის სახელმწიფო ანსამბლს, დათო კენჭიაშვილს და ჭეშმარიტი ხელოვნების დღესასწაულად აქცია დღეები, რომელსაც  განსაკუთრებული სიხარულით ელიან მუსიკის მოყვარულები.

ფესტივალის დამაარსებელი და სამხატვრო ხელმძღვანელია – მსოფლიოში აღიარებული პიანისტი, პიანისტთა საერთაშორისო კონკურსების მრავალგზის ლაურეატი, ხელოვნების აკადემიის რექტორი, სენაკის საპატიო მოქალაქე, ვალერიან შიუკაშვილი.

,,სენაკის ფესტივალი 2021’’, 6 დღის მანძილზე, ვარსკვლავცვენითა და სიურპრიზებით სადღესასწაულო განწყობას შეუქმნის მაყურებელს, დასავლეთ საქართველოს მასშტაბით, უმასპინძლებს სამუსიკო და სახელოვნებო სკოლების მოსწავლეებს, გამოავლენს უნიჭიერესებს.

ფესტივალის მეორე დღე, ცნობილი შემსრულებლის, ნეკა სებისკვერაძის კონცერტს დაეთმობა.

სენაკის მეშვიდე მუსიკალური ფესტივალი, 6 მაისს, გრანდიოზული გალაკონცერტით დასრულდება.