პრემიერ-მინისტრი ზუგდიდის დადიანების სასახლეების დედოფლისეული რეზიდენციის რეაბილიტაციის პროექტს გაეცნო.

ზუგდიდის დადიანების სასახლეების დედოფლისეული რეზიდენციის რეაბილიტაცია იწყება, – ამის შესახებ საქართველოს პრემიერ-მინისტრმა ირაკლი კობახიძემ დღეს ზუგდიდში განაცხადა.

მთავრობის მეთაური, კულტურის მინისტრ თინათინ რუხაძესთან, მთავრობის, პარლამენტის წევრებთან, სახელმწიფო რწმუნებულ დავით ვერავასათან და ადგილობრივი ხელისუფლების წარმომადგენლებთან ერთად, დადიანების სასახლეთა ისტორიულ-არქიტექტურულ მუზეუმს ეწვია და დედოფლისეული რეზიდენციის რეაბილიტაციის პროექტის დეტალებს გაეცნო.

რეაბილიტაციის შედეგად სრულად გამაგრდება სასახლის კონსტრუქცია, საძირკველი, ასევე რესტავრაცია ჩაუტარდება რეზიდენციის საგამოფენო დარბაზებს და მათ ავთენტური, ისტორიული სახე დაუბრუნდება. რეაბილიტაციის პროცესში უფლისწულის სასახლისთვის მომზადდება სპეციალური სადრენაჟო სისტემა, რომელიც სასახლის საძირკველს ზედმეტი ნალექისაგან დაიცავს.

„ვგეგმავთ მასშტაბურ რესტავრაციას. ეს შეეხება როგორც სასახლის ფასადს, ასევე შიდა სივრცეებს. თავიდან ბოლომდე საფუძვლიანად იქნება რესტავრირებული დადიანების სასახლე. ეს სასახლე არის ჩვენი სიამაყე და მასზე ზრუნვა ჩვენი განსაკუთრებული პასუხისმგებლობაა. მინდა, მადლობა გადავუხადო კულტურის მინისტრს, რომლის ინიციატივაც იყო ეს ყველაფერი და ჩვენ ამას მხარი დავუჭირეთ”, – განაცხადა ირაკლი კობახიძემ.

პროექტი, რომელიც საქართველოს ძეგლთა დაცვის სააგენტოს არქიტექტორ-რესტავრატორების, ხელოვნებათმცოდნეების და ისტორიკოსების ჩართულობით მომზადდა, 2028 წელს დასრულდება.